அதிரை நெசவுத்தெருவை சேர்ந்தவர் காலஞ்சென்ற வாத்தியப்பா என்கிற அப்துல் ரஹ்மான். இவரது மகன் ஏ.ஆர் ராஜிக் அஹமது ( வயது 35 ). சொந்தமாக வாகனம் வைத்துள்ளார். இன்று அதிகாலை தனது வாகனத்தில் திருச்சி விமான நிலையத்திலிருந்து தனது உறவினரை ஏற்றிக்கொண்டு ஊர் திரும்பினார். வாகனம் ஒரத்தநாடு அருகே வந்த போது டயர் பஞ்சராகி இருப்பதை கவனித்தவர் வாகனத்தை சாலையோரத்தில் நிறுத்திவிட்டு பஞ்சர் வீலை மாற்றும் பணியில் ஈடுபட்டுள்ளார். அதே சாலையில் தஞ்சையிலிருந்து பட்டுக்கோட்டையை நோக்கி படுவேகமாக சென்ற லாரி ஒன்று ராஜிக் அஹமது மீது பயங்கரமாக மோதியது. இதில் ராஜிக் அஹமது தூக்கி வீசப்பட்டு சம்பவ இடத்திலேயே பரிதாபமாக உயிரிழந்தார்.
தகவலறிந்த ஒரத்தநாடு டிஎஸ்பி செங்கமலக்கண்ணன் மற்றும் காவல்துறையினர் சம்பவ இடத்திற்கு விரைந்து சென்று விசாரணை மேற்கொண்டு வருகின்றனர். இறந்த உடல் பிரத பரிசோதனைக்காக ஒரத்தநாடு அரசு மருத்துவமனைக்கு கொண்டு செல்லப்பட்டது.
சம்பவ இடத்திற்கு விரைந்த சென்ற பேராசிரியர் செய்யது அஹமது கபீர் அதிரை ஆர்வலர்கள் மற்றும் நெசவுத்தெரு மஹல்லாவாசிகளுடன் இணைந்து இறந்த உடலை அதிரை கொண்டு வரும் முயற்சியில் ஒரத்தநாட்டில் முகாமிட்டுள்ளார். பிரத பரிசோதனைக்கு பிறகு இன்று காலை 10 மணிக்கு உடல் உறவினரிடம் ஒப்படைக்கப்படும் என எதிர்பார்க்கப்படுகிறது. இறந்த ராஜிக் அகமதுக்கு மனைவி மற்றும் இரண்டு குழந்தைகள் இருக்கின்றனர்.
பயங்கரமாக மோதிவிட்டு நிற்காமல் லாரியுடன் தப்பிச்சென்ற லாரி ஓட்டுனரை போலீசார் வலைவீசி தேடிவருகின்றனர். அதிகாலை நிகழ்ந்த இந்த கொடூர சம்பவம் இந்த பகுதியில் பெரும் பரபரப்பை ஏற்படுத்தியுள்ளது. மேலும் அதிரை பகுதி பொதுமக்களிடேயே பெரும் சோகத்தை ஏற்படுத்தியுள்ளது.
நன்றி : அதிரைநியூஸ்
No comments:
Post a Comment